قد نحتاج الى البكاء

قد نحتاج الى البكاء

قد نحتاج الى البكاء

قد نحتاج الى البكاء ................ عندما تمر بنا الأيام ونحن ما زلنا كسالى وضعفاء

قد نحتاج الى البكاء عندما نحتاج الى شىء يراه بعضا وهما او سراب ونراه نحن الامل والحياه

فد نحتاج الى البكاء ............ عندما يملؤنا الفضب ونحن فى بداية الشباب

قد نحتاج الى البكاء ......... عندما نتمنى الوصول الى العلياء ونحن فى زمن توافه الاشياء

قد نحتاج الى البكاء ................. عندما نجد احبابنا فى مكان ونحن فى مكان

قدنحتاج الى البكاء ..................عندما نجد اقرب من لدينا يتركنا فى عز الأحتياج

قد نحتاج الى البكاء ...............عندما نحتاج الى الرفاق وهم فى عز الانشغال

فد نحتاج الى البكاء .................. ونحن نجد الامتحان واقفا على الابواب ونحن له لم نستعد ولم نتأهب للأنتظار

قد نحتاج الى البكاء ............ عندما نحتاج الى اب نشعر معه بالحب والعطاء وهو بين يدى الله الخالق الوهاب

قد نحتاج الى البكاء ................عندما نجد انفسنا مقصرين فى حق الغفور التواب

قد نحتاج الى البكاء ........... عندما نجد اسلامنا يهان من الغرباء . ونحن عاجزين عن مجرد الكلام

قد نحتاج الى البكاء .........عندما نرى ما يعانيه المواطن الغلبان من ظلم وارتفاع للأسعار

قد نحتاج الى البكاء

فد نحتاج الى البكاء

قد نحتاج الى البكاء

عندما نريد ان نبكى ونجد دموعنا قد جفت من كثرة البكاء

السعادة

السلام عليكم ورحمة الله وبركاته

من اجمل ما قرأت ...........شعر لدكتور يوسف القرضاوى

السعادة

قل للذى يبغى السعادة هل علمت من السعيد ؟

ان السعادة ان تعيش لفكرة الحق التليد

لعقيدة كبرى تحل قضية الكون العتيد

وتجيب عما يسأل الحيران فى وعى رشيد

من اين جئت ؟ واين اذهب ؟ ولم خلقت ؟ وهل اعود

فتشيع فى النفس اليقين وتطرد الشك العنيد

وتعلم الفكر السوى وتصنع الخلق الحميد

وترد للنهج المسدد كل ذى عقل شرود

تعطى حياتك قيمة رب الحياه بها يشيد

ليظل طرفك رانيا فى الافق للهدف البعيد

فتعيش فى الدنيا لاخرة لاتزول ولا تبيد

وتمد أرضك بالسماء وبالملائكة الشهود

وتريك وجه الله فى مرآه نفسك والوجود

فهل عرفتم اين تجدون السعادة؟

كل عام وانتم بخير

من لم يقم بعرفة فليقم لله الذى عرفه

ومن لم يذبح هديه بمنى فليذبح هواه فيبلغ المنى

ومن لم يصل للبيت؛ لأنه منه بعيد فليقصد رب البيت فإنه أقرب إليه من حبل الوريد

..

.كل عام وأنتم بخير,, وتقبل الله منا ومنكم

جنون المرتب ..على جنون الاسعار

____________________________________

الشيخ المدخن

من أجمل ما قرأت

قصيدة عن الشيخ المدخن ياريت تقرؤها بتمعن معانيها حلوة اوى
بس للاسف مش عارفة مين اللى كاتبها

قصيدة بعنوان

الشيخ المدخن

لكن كل العيب فيمن يدعى حمل اللواء لنصر دين محمد

وترى اليسجارة فى يديه كأنها رمز الجحيم لكل عاص فاسد

هى عينات من جهنم احضرت كوسائل الإيضاح فاهم مقصدى

ولذاك أسال شيخنا فى درسه حين المواعظ او بساحة مولد

اذكرت اسم الله قبل تناول ؟ احمدته بعد المزاج (الجامد

اهناك ادعيه السجائر مثلما كان الدعاء لرائح او عائد

او مثل ادعيه الفطور لصائم ودخول سوق او دخول المسجد

هل انت تمسك باليمين سجائرك ؟ ام بالشمال وما الدليل ؟ لنقتدى

بالله ياشيخ الحداثة افتنا فى المحدثات فانت تفهم مقصدى

ما حكم من يؤذى الجماعة فى الصلا ة ولو بدون تعمد -فى مسجد ؟

فتشم رائحة الدخان وحتى فى جو العبادة - يالجرأة مفسد

أتعيش عبدا للمزاج وللهوى عيش المعذب حائرا لا يهتدى

فأنظر لحالك فى الصيام وعندما (نأح المزاج بدون سابق موعد

تالله لا ماء تريد ولا غذاء وانما حرق الدخان الاسود

خرمانا سبح ربه وقت الصيام -بلذه -فى مسجد

سئل ابن حنبل كيف لا تأكل من البطيخ اهو محرم ياسيدى

فأجاب كلا انما أنا تابع لم يدر فيه -كيف أكل محمد

عذرا لكم

عذرا لكم

بشار بن برد

ابو العتاهية

المتنبى

ابو نواس

عذرا لكم

لقد مللت حديثكم

وافتقدت كثيرا حديث المدونات

اسمحوا لى ان اترككم برهة من الزمن حنى اتصفح مدونتى الغالية التى هى اصبحت بمثابة بيتى الثانى



اختى فى الله رابعة العدوية

احبكِ كثيرا ولكننى ايضا من حقى ان اروح عن نفسى قليلا

عذرا لكى ساتركك ساعة واحدة وسأعود اليكى مرة اخرى



المتنبى شاعر العروبة

حقا لقد تعلمت منك الكثير

ولكننى ايضا تعلمت من زميلاتى وزملائى المدونون الكثير والكثير

عذرا لكم جميعا

كل شعراء العصر العباسى

سأرجع لكم بعد قليل



*ادعوووووووووووووووووولى

بالله عليكم لقد اقترب وقت الامتحان

الذى يكرم فيه المرء او يهان

اللهم اكرمنى ولا تهنى

وزدنى ولا تنقصنى

وقد وصل التاج

من

د خبيب , م/ ابن تيمية (بخرف , ا/ اسامة مرسى



شكرا جزيلا ولكن ربنا يسطر مش عارفة حسة انها اسئلة صعبة جدا



بس عموما هحاول اجاوب عليها

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟

انا اشايفة انى دى افضل عصر اعيش فيه كبنت عايزة تتعلم وتتثقف وتطور من نفسها

وده مش متوافر فى اى عصر تانى



أول أولوية فى حياتك عيلتك ولا شغلك ولا اصحابك؟

هى عيلتى طبعا بس دائما بحس انى مقصرة فى حقهم



ايه أكتر حاجة بتحبها فى رمضان ؟

ليلة 27 رمضان وليلة الوقفة



اوصف أجمل فطار ممكن تفطره؟

فى رمضان اجمل فطار فطرته فى المصرية بلازا عشان كنت مع اصحابى



لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟

هدعى ربنا انى اعدل ما بينهم

هتاكد لما اشوفهم بيقدرونى فى غيابى زى وجودى



مين أكتر اعلامى مصرى بتحترمه ؟

بحترم منهم

منى الشاذلى

قنديل

عمرو اديب بس بضايق منه فى حاجات معينة

وطبعا ابراهيم عيسى

ومذيع برنامج زيارة خاصة على الجزيرة بس مش فاكرة اسمه



_______

لو ممكن تشتغل شغلانة تانية كنت تتمنى تبقى ايه ؟؟



معدة برامج دينية وحوارية

مراسلة فى قناة الجزيرة

مديرة ادارة الموارد البشرية فى شركة كبيرة

_______________
ايه تانى بلد تتمنى تعيش فيها بعد مصر ؟؟



دبى

ويكون عندى شقة فى المدينة



___________


اوصف ترتيبات اجمل فرح ممكن تحضره ؟

فرح اسلامى بس فى قاعةويغنى فيه

مصطفى محمود ومعز مسعود

_____________



بتراعى كلام الناس والقيل والقال ؟؟ ولو اه او لا قول ليه ؟

بصراحة شوية

بس مش على طول ومش فى كل حاجة



_______________


صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟



بصراحة لأ خالص

ما قدرش اعيش



___________
السعادة هى ..؟



دى بقى عايزة كلام كتير

اوله لما علاقتى بربنا تكون كويسة واحس انه راضى عنى

ولما انجح فى حياتى واحس انى بزود شىء فى الحياه

ولما اشوف ابتسامة امى واحس انها مبسوطة

وحاجات كتيييييييييييييييير



___________

لما بتحب تهرب من كل شئ بتروح فين ؟؟

لو انا برا البيت بروح المسجد

او بروح الجنينة اللى فى الجامعة واقعد لوحدى واكتب

لاما بقعد على النت

او اروح العب مع بنات اختى

____________
امتى اول مرة خدت فيها نفس طويل وقلت ياااه انا فعلا كبرت ؟؟

لما تميت عشرين سنة

ولما بقيت فى ليسانس كلية

_________________
بتشرب سجاير ؟؟ وايه شعورك اما ست او راجل بيشرب سجاير ؟ ليه ؟

اكيد لا

بشعر بانهم لو عايزين يبطلوها كانوا بطلوها....... موضوع ارادة يعنى

___________________

بتعرف ايدك اليمين من الشمال ازاى ؟؟

ايدى اليمين اللى بمسك بيها الماوس

________________


ايه اكتر موسيقى بتحبها ؟

موسيقى الاطفال

________________

فى رأيك ليه الذوق والنخوة اتعدموا ؟

لاننا مش فهمينا جوهر الاسلام صح

انا فعلا بعانى من موضوع الذوق ده الناس كلها ما بقاش عندهم ذوق

____________________

ايه الحاجة اللى لو حصلت لك حتبقى سعيد اوى

حاجات كتير اوى

________________________

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟

لأ كام عمارة

ويبقى عندى شقة فى كل عمارة منهم لانى بحب التغيير جدا



_____________

البحر ولا النيل ؟

بصراحة الاتنين بموت فيهم

______________
مركب ولا طيارة ؟

مركب وطيارة

_______________
مجنون ولا عاقل ؟



مجنونة جدا جدا جدا

_________


تقرا كتاب ولا تتفرج على فيلم ؟

لو فيلم وثائقى على قناة الجزيرة اوك

لكن غير كدة يبقى كتاب بس يكون شيق

_________


تمرر التاج ده لمين ؟

مروة جمعة

العسكرى عتريس

مصر من تانى

امير الهدوء

طال الليل

حوار ....... مع بذرة امل

سألتها

امتى بقى يا بذرة امل تكبرى وتبقى شجرة امل

قالتلى ....

لما اعيش فى ارض ............ الحب فيها اساس والتقوى فى قلوب الناس

وايه كمان ؟؟؟؟؟؟؟؟؟؟؟؟؟؟

ولما أشوف صحابى حواليا

بيدعولى ويقربوا ليا

وايه كمان ؟؟؟؟؟؟؟؟؟؟؟؟؟؟

ولما أشوف فى البلد ديمقراطية

والناس فاهمة يعنى ايه حرية

وايه كمان ؟؟؟؟؟؟؟؟

ولما أشوف السجاير ممنوعة من الشوارع

والبانجو والحشيش انتهوا فى العهد الحديث

وأيه كمان ؟؟؟؟؟؟؟؟؟؟؟؟

لا لا

حاجات كتييييييييييييييييييير معلشى استنى للمرة اللى جاية

عشان عندى بحث فى الادارة التعليمية

انا والبيوقراطية

انا والبيوقراطية

بلدنا دى للاسف بلد ورق

لما تعرفوا حكايتى مع البيوقراطية والروتين هتعرفوا اد ايه انا شوفت منها كتيييييييييييييييييييير
ولما تيجوا تعرفوا صفات شخصيتى هتستغربوا انا ازاى بتعامل معاها فى اليوم كذا مرة
انا شخصيتى معبرة جدا ده نوع من انواع الشخصيات اللى بيتخنق من اقل حاجة وبيكره جدا الروتين والتقليدية والقيود يعنى ما قدرشى اعيش فى حجرة مغلقة وحاواليها اسوار . وده فعلا اللى بحس بيه طول ما انا عايزة انجز اى عمل اريد الموافقة عليه فى الكلية . بحس انى مقيدة والاحساس ده بيقتلنى . تخيلوا معايا لو حد فيكوا عايش وهو عنده كذا ولى امر ولازم كل ما يعمل حاجة ياخد رأيهم كلهم قبل حتى ما يفكر. هيحس بايه اكيد هيحس بالملل وبعد كدة هيكسل يعمل حاجة عشان ما يلفش اللفة الطويلة العريضة كل مرة . اهو بالضبط انا كدة فى الكلية عندى كذا ولى امر لازم عشان انفذ اى شىء الف اللفة دى كل مرة . وده صدقونى عكس طبيعة شخصيتى تماما انا بحب الحرية فى العمل ما دام انا عارفة ضوابطه الدينية والاجتماعية كويس . يمكن كان اعتراضى فى اول الامر عن عدم دخول اتحاد الكلية ومجلس الاتحاد لكنى توكلت على الله وصدقت النية لانى فعلا نفسى اترك بصمة تغيير فى الكلية قبل التخرج . حاجات كتير اوى عايزة اعملها بس للاسف كل حاجة من الحاجات دى عايزة موافقة قبلها بحوالى اسبوعين . وده بيخلينى فى حيرة دائمة لانى بقى عندى كسل حتى فى التفكير لانى فعلا فى حجرة مغلقة .
السؤال ..... تفتكروا انا غلطانة عشان انا لازم اتكيف مع الروتين ده واقول لنفسى كل الناس عايشة كدة والكل عارف ان بلدنا بلد ورق
ولا بلدنا هى اللى بيوقراطية زيادة عن اللزوم . اعتقد كدا . شاركونى بتعليقاتكم وقولولى اتعامل ازاى مع الروتين اللى خلااااااااااااااااااااص خانقنى

قافلة الحياه

قافلة الحياه تسير امامى ....تسير امامى بسرعة لم اكن اتصورهاومعها انااااااااااس كثيرة ...........كنت ازعم اننى سارحل معهم
ولكنى ....... ما زلت اقف اشاهدهم من بعيد واتحدث عنهم وعما يفعلونه وبداخلى رغبة شديدة فى الذهاب معهمرأيت معم زادا كثيرا يحملونه لتحمل مشقة الطريقطلبوا منى الذهاب معهم على ان يكون لدى زادا كثيرا .......بحثت عن ما املك من زاد .........فوجدت زادى ما زال قليلا فقالوا لى ..........سنتركك حتى تتزودى زادا كثيرا وقالوا ايضا ان الوقت لم يعد طويلا ..........تعجلى حتى تلحقى بناتركتهم وبكيت ولكن بداخلى بذرة امل ان الحقهم فى قافلة الحياةواخذت ابحث عن خير الزاد ............ الايمان والعلم والاخلاص والخلق الحسن والعقل الحكيم

صراع البقاء

يمكن عنوان الموضوع ده كئيب حبتين بس لانه شاغلنى جدا الايام دى قررت انى اكتب فيه

لأنه موجود جوا كل الناس اللى بتعامل معاهم ويمكن كمان موجود عندى انا كمان بس الصراع ده بيتفاوت فى النسبة ما بين شخص لاخر

ندخل فى الموضوع

مثال رقم 1

لو سالت موظف ما فى اى مصلحة حكومية انت لية شايف رئيسك فى الشغل بيعمل حاجات كتير غلط ايشى رشوة على ايشى اهمال على ايشى محسوبية بتسكت ليه وما بتتكلمشى

هيقولك لانى خايف على لقمة عيشى انا لو اتكلمت ايه ضمنى انهم يفصلونى وانا عندى عيال عايزين يكلوا ويشربوا ويعيشوا

يعنى معنى كلامه كله بيدور حوالين المفهوم ده اللى هو صراع البقاء

مثال 2

لو سألت طلاب الجامعات انتم لية ساكتين على رفع اسعار الكتب والمصاريف الدراسية

هيقوللك ان سبب من الاسباب اسامينا هتتاخد ولا هنعرف نسافر ولا اى حاجة

ده برضه نوع من انواع صراع البقاء

مثال 3

لو سألت واحدة انتى لية صابرة على خطيبك ووافقتى عليه من الاول رغم قلة دينة وقلة ثقافته

هتقولك خايفة لو سبته ما لأيش حد متريش زيه وانتم شايفين حال الشباب عامل إزاى

وده برضه نوع من انواع صراع البقاء

وامثلة كتير وكتير بتحضرنى

ياريت لو عندكم امثلة تانية تقولوا عليها

وتقولولى ايه رايكم فى الموضوع ده

شباب مصر .... الى اين ؟

شباب مصر .......؟ ألى أين ؟

جانب من حياة المصريين

الهجرة ...وسراب الجنة الموعودة

الفترة اللى فاتت دى لاحظت شوية مشاكل يمكن ما كنتش واخدة بالى منها

خلتنى اقول الله يكون فى عون شباب مصر

زى ايه المشاكل دى اللى باينة زى وضوح الشمس

مثلا ارتفاع اسعار الشقق بصرف النظر شقة صغيرة او كبيرة

يعنى اقل حاجة دلوقت الشاب يأخذ شقة حجرتين وصالة وفيها مثلا بالكونة

يبقى ايجارها حوالى 300 جنية ده لو هو محظوظ

طيب لما نيجى نقارنها بمرتب شاب فى اول حياته ممكن يحصل على كام؟

نقول حوالى 500 جنية ده كحد اعلى

طيب تفتكروا باقى المرتب هيكفى ايه ولا ايه

فيضطر الشاب للسفر للخارج

وبيدور طبعا على سفرية مريحة فى الفلوس

فا ما يلاقيش غير ليبيبا بلد قريبة ومش محتاجة اوراق كتير

ويوصل ليبيا ويلاحظ ان الحال ما اتغيرشى كتير يعنى ما يستاهلش تعب الغربة

فيراوده حلم السفر لايطاليا عشان يزود دخله ويعيش حياه كريمة

رغم انه عارف ان الموضوع ده خطير واحتمال نجاحه ضعيف جدا

رغم كدة بيرمى نفسه فى التهلكة

وطبعا دى رحلة طويلة بعد ما بيرمى جواز سفره وبطاقته قبل ما يهاجر

عشان ما حدش يتعرف عليه

وتبتدى الرحلة ويركب الشاب مع بقيت زمايله الهربانين

من ضيق العيش والباحثين عن الحياه الكريمة

واللى منتظرين ان احلامهم البسيطة تتحقق

ولكن للاسف بتنتهى دائما الحكاية نهاية مأسوية

بغرق المركب وموت الشباب

وضياع احلامهم وامالهم

___________

وينزل الخبر على شريط الاخبار على القناة الاولى

وفاة 26 شاب ونجاه 49 اثناء هجرتهم الى ايطاليا هجرة غير شرعية

خبر عادى جدا زيه زى اى خبر

____________-

سؤال بيدور فى دماغى ايه السبب ؟

لو حد عارف ايه السبب ياريت يقول

وسؤال تانى ......اشمعنا شباب مصر اللى بيعملوا كدة وبيفكروا بالطريقة دى ؟

ياريت تساعدونى فى الاجابة

____

ماذا بك يا قلمى ؟

ماذا بك يا قلمى؟؟؟؟؟؟؟؟؟؟؟؟؟؟؟

لماذا تعجز عن الكتابة هل من عدم وجود شىء تريد ان تعبر عنه ؟

ام من كثرة الافكار التى تريد ان تعبر عنها ؟

لماذا اصبح الصمت هو لغتك الوحيدة ؟

الم تعلم اننى افتقدك ؟ الم ترجع للكتابة مرة اخرى ؟

الم تعلم مدى تاثير وجودك فى حياتك ؟

وما هذه الحيرة التى تنتابك كلما تهم ان تكتب فى شىء

تتراجع عن كتابته ؟

حقا لا اعلم ماذا بك ؟ ولا اعلم فى ماذا تريد ان تكتب ؟

فى الفجوة بين الحكومة والشعب ؟ام فى غلاء الاسعار

ام فى السلبية الموجودة بين افراد المجتمع

ام فى عدم المصداقية التى تعانى منها فى كل شىء

ام تريد ان تكتب عما اعانى منه من تضخم للمناهج وعدم استيعابها وعن عدم ادارتى للوقت بشكل جيد

ام عن الاشياء الكثيرة التى اريد ان احققها فى اوقات قياسية

ام عن رغبتى فى وضع بصمة تغيير فى الكلية خلال 6 شهور فقط هى فترة بقائى فيها

الى الأن لا اعلم ................ فى ماذا تريد ان تكتب

ولكننى اطلب منل وارجوك ان لاتغب عنى كثيرا

لاننى افتقدك

ابراهيم عيسى

ابراهيم عيسى

فارس الكلمة الصريحة

فى حياتك ممكن تقابل ناس يؤثروا فيك

رغم انهم ممكن ما يكونوش معاك

تستفاد منهم من كلام بيقولوه او كلام بيكتبوه

كلامهم تلاقيه بيدخل عقلك وقلبك

ويخليك على بصيرة بكل شىء بيحدث ويخليك تفكر بيحصل ليه

وازاى وايه السبب

وايه الحل والمشكلة دى اصولها ايه فى الدين والتاريخ

ويعبر عن تساؤلات كتير بتدور فى عقلك ويجاوب عليها

ابراهيم عيسى من اكثر الناس اللى اثروا جدا عليا

الراجل ده ياريت كلنا نسمعله لانه مش بس بينقد حال البلد لمجرد نقدها

لانه فعلا خايف عليها

عشان كدة

انا متضامنه معاه ومع كل شريف فى البلد دى بيتكلم وبيعبر عن حقوقه

وبيثبت على الحق رغم كل الاغرائات اللى بتتعرض عليه

وبدعى ربنا يثبتهم

نصرة النبى

السلام عليكم ورحمة الله وبركاته

ده لينك مدونة طال الليل ادخلوا

وانتم هتعرفوا التفاصيلhttp://shahadaty.blogspot.com/ده
مشروع ياريت يا جماعة كلنا نشارك فيه

بكل اللى نقدر عليهالفكرة هى نشر سيرة الرسول ( صلى الله عليه وسلم ) بعشر لغات ا لسيرة


منشورة على موقع طريق الاسلامhttp://www.islamway.com/mohammad/

جاء وقت الرحيل

جاء وقت الرحيل

فى البداية جاءنى الضيف الكريم معه حقائب من زاد كثير

.......... وقال لى هل انتى مستعدة ؟ .........لتقبلى على الخير الكبير

قلت له : نعم بالتأكيد ولكننى الان : مشغولة باشياء تحتاج منى وقت ليس بالقليل

معزرة انتظرنى سأءتى لك بعد حين

_________

فى الوسط

مرة ثانية :

قالى لى الضيف الكريم وما زال معه الحقائب ذات الزاد الكثيير

هلمى اقبلى فلم يعد امامك وقت كبير

قلت : معك حق سأءتى حالا .........ولكننى مشغولة بالتفكير فى شئون حياتى.........هل سأكون او لا أكون

ذهبت اليه ولم أخذ من الحقائب الا القليل

____________

فى اخر الايام

قال لى الضيف الكريم

هلى خرجتى مما كنتى فيه ؟

فلم يعد هناك وقت للتفكير ........فلقد اقترب وقت الرحيل

قلت له نعم ....خرجت مما كنت فيه ....

واخذت اقبل على الحقائب ذات الزاد الكثير ......وأخذت من كل حقيبة زادا ولكننى ارى انه قليل

لأن الوقت لم يعد طويل

وبكيت وندمت على ما فرطت من الخير الكبير

وجاء الان وقت الرحيل

قافلة الحياة

قافلة الحياه تسير امامى ....تسير امامى بسرعة لم اكن اتصورها

ومعها انااااااااااس كثيرة ...........كنت ازعم اننى سارحل معهم

ولكنى ....... ما زلت اقف اشاهدهم من بعيد واتحدث عنهم وعما يفعلونه وبداخلى رغبة شديدة فى الذهاب معهم

رأيت معم زادا كثيرا يحملونه لتحمل مشقة الطريق

طلبوا منى الذهاب معهم على ان يكون لدى زادا كثيرا .......بحثت عن ما املك من زاد .........فوجدت زادى ما زال قليلا فقالوا لى ..........سنتركك حتى تتزودى زادا كثيرا وقالوا ايضا ان الوقت لم يعد طويلا ..........تعجلى حتى تلحقى بنا



تركتهم وبكيت ولكن بداخلى بذرة امل ان الحقهم فى قافلة الحياة

واخذت ابحث عن خير الزاد ............ الايمان والعلم والاخلاص والخلق الحسن والعقل الحكيم

اعجب الاشياء

من اعجب الاشياء

من اعجب الاشياء ان تعرفه ثم لا تحبه

, وان تسمع داعيه ثم تتاخ عن الاجابة

وان تعرف قدر الربح فى معاملته ثم تعامل غيره

وان تعرف قدر غضبه ثم تتعرض له , وان تذوق الم الوحشة فى معصيته ثم لا تطلب الانس بطاعته

, وان تذوق عصرة القلب عند الخوض فى غير حديثه والحديث عنه , ثم لا تشتاق الى انشراح الصدر بذكره ومناجاته

وان تذوق العذاب عند التعلق بغيره والا تهرب منه بنعيم الاقبال عليه والانابة اليه

ابن القيم

الطريق الصح

الطريق الصح

من اكثر البرامج اللى اثرت فيا جدا السنة دى فى رمضان وبدعو كل اللى بشوفهم انهم يشاهدوه لانه فعلا برنامج قيم جدا
هو برنامج الطريق الصح للداعية معز مسعود على قناة اقرا الساعة 11 وربع بسم الله ما شاء الله اد ايه كلامه مقنع جدا واد ايه السيناريو بتاع البرنامج جميل جدا ما تتخيلوش اثر فى طريقة تفكيرى ونظرتى للامور اد ايه ربنا يتقبل منه ويجازيه كل خير
ود الموقع بتاعه
http://www.moezmasoud.com

احب الموت على ان اعيش حياه تستحق الموت

تخاريف

امبارح كنت هناك وهناك وهناك

والنهاردة هنا وبكرة ان شاء الله هناك

ايه اللى بيحصل ؟

الله اعلم

ده شىء غريب

بس لذيذ وممتع

ناس جديدة _ اماكن جديدة وكمان طريقة تفكير جديدة

طب فين هناك بتاع بكرة ؟

الله اعلم

معقولة ؟

بجد ما عرفشى يعنى انا كنت عارفة لما كنت هناك انى هكون هنا ؟

صحيح؛؛؛؛؛؛؛؛؛

والحياة ؟

اكيد هيحصل فيها تغيير

والاصحاب ...لا الا دول لو الصداقة حقيقية هتبقى لاخر العمر

طب والشغل لو مقتنعة هروحله ولو فى اخر بلاد المسلمين

فعلا شىء محير

ليه محير ؟؟؟؟؟؟؟؟؟

يعنى هما اللى هنا عارفين بكرة ان شاء الله هيكونوا لسة هنا ولا ممكن يكونوا هناك ؟؟؟؟؟؟؟؟

فعلا ؛؛؛؛؛؛؛؛؛

سمعتى الشاعر بيقول ايه ؟ بيقول ايه ؟؟؟؟

سهرت اعين

ونامت عيون

فى شئون تكون

او لا تكون

ان ربا كفاك بالامس ما كان سيكفيك فى غد ما يكون

يافرحة ربنا بيك

يافرحة ربنا بيك

قرات خبر على النت خلى قلبى

يطير من الفرح

بجد هى دى الاخبار اللى تفرح الخبر هو

توبة رئيس اكبر واشهر موقع غنائى فى الوطن العربى

http://www.6rab.net/موقع طرب الغنائى سابقا

يارب يثبته على الحق ياريت ياجماعة كلنا ندعيله ربنا ينور قلبه بنور الايمان

شوفه معايا الكلام اللى هو كاتبه

إلى كل من زار موقعي الذي سمع ما سمع وحمل ما حمل أرجو منه أن يستغفر لي عن ذنبي فقد أذنبت في حقي الكثير وأرجو من الله المغفرة ، كما أرجو منه أن يتخلص من أي اغنية او ملف صوتي حملها من الموقع وكانت تحمل المنكرات من الأغاني والصور ولا احلله ولا أبيحه إن بقيت لديه واحتفظ بها سواء كان على جهازه الشخصي أو صاحب موقع يعرضها في موقعه، واشهد الله على إنني تبت إليه توبةً نصوحة ، اللهم هل بلغت اللهم فشهد ،،، موقع طرب نت ..

اللى يعيش يا ما يشوف

اللى يعيش ياما يشوف

كنت النهاردة فى احد المؤتمرات الخاصة بالشباب واللى هدفها تجميع الشباب مع رموز المجتمع المصرى عشان يتعلموا منهم ويقتدوا بيهم

وكانت الفكرة تقسيم المؤتمر لورش عمل كل ورشه معاها احد الرموز دى

فانا كان قدرى مع احد الكتاب البارزين فى مصر واللى كان زميل لنجيب محفوظ وفاروق حسنى وفاروق جويدة والمجموعة دى

من غير ما اطول عليكم الكلام جاب بعضه واتناقشنا مع وسالته اسئلة كتيرة

اولها حضرتك انا عرفت ان والد حضرتك كان من رجال الاخوان ليه حضرتك ما طلعتش زيه ؟؟؟؟؟

الرد : بصراحة انا حفظت القران من صغرى ولما كبرت حسيت انى عايز اكون مستقل واقاربى حاولوا انهم يبعدونونى عن جو الاخوان

ملحوظة الاسئلة دى بعض صلاة الظهر كلنا روحنا صلينا وهو لا

سالته ايه راى حضرتك فى الحالة الدينية فى مصر

الرد : بصى الايمان هو ايمان القلب والمعاملات تكون سليمة مع الناس وما فيهاش كذب ولا غش وادانا محاضرة عن الفرق بين الكدب والغش

سالته : قلتله هل احنا مش مؤمنين كفاية بالقضاء والقدر

الصدمة : استغفر الله العظيم

قالى ما فيش قضاء وقدر

قلتله نعم قالى ايوة وما فيش حاجة اسمها الرزق مكتوب

انا استغربت جدا

وبدات افهم

سالته : ازاى اذا كانت عقيدتنا الاسلامية قائمة على الايمان بالله وملائكته وكتبه ورسله واليوم الاخر والقضاء والقدر خيره وشره

قالى مين قال كدة

قالته القران والحديث

قالى ايش ضمنك ان الحديث ده سليم قولتله حديث صحيح قالى لا ما فيش ولا حديث مضمون

بدات افهم الحكاية ايه ؟؟؟؟؟؟؟

قالتله امال احنا عرفنا ازاى نصلى ازاى مش من السنة؟

قالى تعرفى اننا بنركع غلط

قولتله نعم قالى المفروض اننا نركع على ركبتنا

زميلتى قالته هو حضرتك بتصلى كدة راكع على ركبتك فى المسجد قالها لا عشان ما عملشى فتنة

بصلى كدة لما بكون لوحدى

____________

الجزء التانى من الحديث

سالته ايه رايك فى القرانيين؟

قالى د احمد صبحى اللى هو التوب بتاعهم كان شيخ فى الازهر وكان صديق ليه وانا مش عارف هما كفروه ليه ما قالشى حاجة تستاهل تكفيره

سالته ايه رايك فى العلمانية ؟

قالى انتى عارفة معناها قالته يعنى فصل الدين عن الدوله

قالى لا يعنى ترك حرية الاعتقاد

قالته عن تجربة انتخاب رئيس لتركيا مسلم وامتناع الجيش عن تحية زوجته لانها محجبة

هل دى فيها حرية اعتقاد ؟ ومعروفة ان تركيا بلد علمانية

____________

اتكلمنا عن الحجاب قال مش فرض وهو مجرد الزام المفروض انه يغطى الشعر والرقبة

واتكلمنا عن الحساب

وقولتله ان اول ما يحاسب عليه العبد يوم القيامة الصلاة

قالى لا مين قال الكلام ده المفروض ان المسلم يكون عبد صالح

وقالى فيما معناه ان موضوع الصلاه مش مقياس

زميلتلى سالته عن احاديث البخارى

قالها مش مضمونة

وقالها ان الرسول نوهه عن كتب احاديثه وما فيش احاديث مضمونة البخارى ده كان بيجمع الاحاديث من الناس فى الشارع

__________

وكان بياكد فى حديثه ان المفروض المواطن المسلم يشغل عقله ويكون عنده وعى دينى

اكتر من كدة ويعرف حاجات كتير

وكان منها اننا المفروض فى رمضان نفطر اول ما الدنيا تليل ويظهر النجم اللامع فى السماء يعنى بعد المغررب بحوالى تلت ساعة

واراء غريبة جدا

خلانى اسال نفسى الراجل ده قرانى ولا علمانى اوقات احس بكدة واوقات احس بكدة

خلانى احمد ربنا انى مسلمة فاهمة دينى كويس ومقتنعة بيه جدا

بس للاسف بعد ما الورشة خلصت سمعت تعليقات من ناس بتقولى تعرفى انه عند حق فى حاجات كتير

حاولت انى افهمهم وادعوهم انهم يقراوا اكتر عن الاسلام

واننا ما نسمعش للناس اللى بتتكلم اللهجة دى كتير

وفعلا اللى يعيش ياما يشوف؛؛؛؛؛؛؛؛؛؛؛؛؛؛؛

ذكريات الطاعة

ذكريات الطاعة

كنت قرائت قبل كدة كتيب اسمه عباد لله _اوائل الدفعة

الكتاب ده فيه افكار جميلة جدا من اجملها واللى حبيت اوى انى اطبقها هى فكرة ذكريات الطاعة

ذكريات الطاعة ؟؟؟؟؟؟؟؟؟؟؟؟

يعنى ازاى تكون لك فى كل مكان ذكرى طاعة لله تعالى . يعنى يكون ليك تاثير ايجايى وفعال فى كل مكان انت بتتواجد فيه

بتبتدى من اول بيتك اللى انت ساكن فيه وكمان المسجد اللى بتصلى فيه والكلية او اى جمعية انت مشترك فيها اى مكان بتروحه سواء بصفة مستمرة او

مكان روحته لتؤدى غرض ما .

افتكرت ليه الصحابى الجليل انس بن مالك رضى الله عنه كان بيقول

( ماندمت على شىء كندمى على يوم غربت فيه شمسه ولم يزد فيه عملى )

وكمان سيدنا عمر بن عبد العزيز ليه كان بيضع نية فى كل خطوة فى حياته

لانهم فعلا كانوا فاهمين المعنى

ده وكانوا بيطبقوه

ياريت نزود من ذكرياتنا فى الطاعة اكيد حياتنا ساعتها هتتغير للاحسن ومش هنلاقى اى وقت نقضيه فى التفكير فى تفاهات ممكن تاثر على حياتنا

تخيلوا معايا بعد فترة من دلوقتى لو عدينا على مكان احنا كنا بنتواجد فيه وكنا فعلا بنطبق المعنى ده اكيد هنلاقى صورة الطاعة اللى كنا بنعملها بتترسم ادام عينينا

مثال

تخيلوا معايا بعد تخرجنا من الكلية واحنا رايحين نسحب شهادة التخرج

هنقول ساعتها اشهدى عليا ياكليتى انى كنت بدعو زمايلى لطاعة ربنا وكنت بصلى على طول فى مسجدك وكنت بساعد زمايلى فى المزاكرة واد ايه كنت بحاول اتحصل على العلم عشان انفع بيه امتى

بجد احسااااااااااس رااااااااااااااائع

ياريت فعلا نستشعره ونطبقه فى حياتنا

(للهم اجعلنا ممن يسمعون القول فيتبعون احسنها

تساؤلات

تساؤلات

احيانا بتراوضنى اسئلة كتيرة وبحتار فى الاجابة عليها
وبتتعجب من اشياء كثيرة بتحصل حواليا وبرضه بحتار فى الاجابة عليها.

__________

علامات تعجب؛؛؛؛؛؛؛؛؛؛؛؛؛؛؛

عجبت لمن اهداه الله علما كثيرا

ولم يفعل به الا قليلا

عجبت لمن كانت رغبته فى مجالسة الاخيار

ولم يفعل مثلهم الا ضئيلا

عجبت لمن جعله الله مسلما

ولم يعرف عن اسلامه الا قليلا

عجبت لمن استسلم لظروفه

وترك الاخذ بالاسباب الكثيرة

عجبت لمن كان شغله الشاغل ا لبحث عن حقوقه

ولم يفعل من واجباته الا شيئا ضئيلا

____________

علامات استفهام؟؟؟؟؟؟؟؟؟؟؟؟

لماذا مع علمنا بالقضاء والقدر نبكى ونحزن؟؟؟؟؟؟؟؟

لماذا مع علمنا بيوم الحساب نغفل ونتكاسل ؟؟؟؟؟؟؟؟؟

لماذا مع علمنا ان الرزق مكتوب نتعجله ونتسارع عليه ؟؟؟؟؟؟؟؟؟؟

لماذا مع علمنا ان الله سبحانه وتعالى هو الوكيل نتوكل على غيره؟؟؟؟؟؟؟

لماذا مع علمنا ان الله رقيب علينا لا ناتى باوامره ونبعد عن نواهيه؟؟؟؟؟؟؟؟؟

لماذا مع علمنا ان الجنة حق ونعيمها الدائم حق . نبحث دائما عن نعيم الدنيا الفانى ؟؟؟؟؟؟؟؟؟؟؟؟؟

____________

ابن القيم قال موعظة حلوة اوى

فرغ خاطرك بما ضمن لك

فان الرزق والاجل قرينان مضمونان

فما دام الاجل باقيا كان الرزق اتيا واذا سد عليك بحكمته طريقا من طرقه

فتح لك برحمته طريقا انفع لك منه

__________

والشاعر محمد مصطفى حمام له قصيدة حلوة اوى بيقول فيها

علمتنى الحياه ان اتلقى كل الوانها رضا وقبولا

ورايت الرضا يخفف اثقا لى ويلقى على الماسى سدولا

والذى الهم الرضا لا تراه ابد الدهر حاسدا او عزولا

انا راضى بكل ما كتب الله ومزج اليه حمدا جزيلا

انا راضى بكل صنف من الناس لئيما الفيته او نبيلا

لست اخشى من اللئيم اذاه لا ولن اسال النبيل فتيلا

فسح الله فى فؤادى فلا ارضى من الحب والوداد بديلا

_________________

سامحينى ............ يا ست الحبايب

شىء محير جدا انك تختار اول موضوع تكتب عنه فى مدونتك
بس انا عندى مواضيع كتير اوى عايزة اعبر عنها.
اول موضوع حسيت انى ما بتكلمشى فيه مع حد وموضوع شاغلنى جدا .
هى امى اغلى ما عندى
احساسى بتقصيرى تجاهها دايما ملازمنى دايما حاسة انها بتدينى كتير اوى وانا مش قادرة اديها اى حاجة
بفكر فى حاجات كتير اوى لكن ليه مساحة تفكيرى عن ازاى اسعدها وازاى احسسها انى انا جنبها ومعاها مساحة قليلة جدا
على الرغم انها بتفكر فيها تقريبا تلت اربع اليوم او تقريبا كله
هل دى انانية منى ولا ايه بالظبط . ليه هى حياتها كلها تضحية من اجلى ومن اجل اخواتى وانا تقريبا ما ضحتيش بشىء عشان اسعدها
اسئلة كتير بفكر فيها
بتخلينى فى النهاية عايزة اروحلها وابوس ايديها واقولها سا محينى
بس هل ده كفاية ؟؟؟؟؟؟؟
اعتقد لا ؛؛؛؛؛؛؛؛؛؛؛؛؛؛؛؛؛؛؛؛؛

دعاء

الحمد لله الذى هدانا لهذا وما كنا لنهتدى لولا ان هدانا الله
praise be to allah who guided to thi s, and in no way could have been guided , unless allah has guided us .