شباب مصر .......؟ ألى أين ؟
جانب من حياة المصريين
الهجرة ...وسراب الجنة الموعودة
الفترة اللى فاتت دى لاحظت شوية مشاكل يمكن ما كنتش واخدة بالى منها
خلتنى اقول الله يكون فى عون شباب مصر
زى ايه المشاكل دى اللى باينة زى وضوح الشمس
مثلا ارتفاع اسعار الشقق بصرف النظر شقة صغيرة او كبيرة
يعنى اقل حاجة دلوقت الشاب يأخذ شقة حجرتين وصالة وفيها مثلا بالكونة
يبقى ايجارها حوالى 300 جنية ده لو هو محظوظ
طيب لما نيجى نقارنها بمرتب شاب فى اول حياته ممكن يحصل على كام؟
نقول حوالى 500 جنية ده كحد اعلى
طيب تفتكروا باقى المرتب هيكفى ايه ولا ايه
فيضطر الشاب للسفر للخارج
وبيدور طبعا على سفرية مريحة فى الفلوس
فا ما يلاقيش غير ليبيبا بلد قريبة ومش محتاجة اوراق كتير
ويوصل ليبيا ويلاحظ ان الحال ما اتغيرشى كتير يعنى ما يستاهلش تعب الغربة
فيراوده حلم السفر لايطاليا عشان يزود دخله ويعيش حياه كريمة
رغم انه عارف ان الموضوع ده خطير واحتمال نجاحه ضعيف جدا
رغم كدة بيرمى نفسه فى التهلكة
وطبعا دى رحلة طويلة بعد ما بيرمى جواز سفره وبطاقته قبل ما يهاجر
عشان ما حدش يتعرف عليه
وتبتدى الرحلة ويركب الشاب مع بقيت زمايله الهربانين
من ضيق العيش والباحثين عن الحياه الكريمة
واللى منتظرين ان احلامهم البسيطة تتحقق
ولكن للاسف بتنتهى دائما الحكاية نهاية مأسوية
بغرق المركب وموت الشباب
وضياع احلامهم وامالهم
___________
وينزل الخبر على شريط الاخبار على القناة الاولى
وفاة 26 شاب ونجاه 49 اثناء هجرتهم الى ايطاليا هجرة غير شرعية
خبر عادى جدا زيه زى اى خبر
____________-
سؤال بيدور فى دماغى ايه السبب ؟
لو حد عارف ايه السبب ياريت يقول
وسؤال تانى ......اشمعنا شباب مصر اللى بيعملوا كدة وبيفكروا بالطريقة دى ؟
ياريت تساعدونى فى الاجابة
____
3 comments:
فعلا هذا الأمر يحتاج متخصصين للرد عليه أو بالأحرى لتحليل الحدث ودوافعه وأسباب تكرره
وشباب مصر ليسوا وحدهم فى هذه المشكلة أيضا شباب من بلاد المغرب العربى وشباب من أفريقيا
إن مشكلة البطالة وتكاليف الحياة ومصاعب المعيشة قطعا رافد وبئس الرافد للمأساة ولكن سؤالى الذى أضيفه لتساؤل حضرتك
هو إلى متى
جزاك الله خيرا
فعلا كلام حضرتك مظبوط الامر محتاج لمتخصصين ومحتاج كمان لجهود مشتركة
لأن الامر اصبح ظاهرة لابد من معرفة اسبابها وايجاد حل بديل للشباب دول
الهجرة بصفة عامة هى حلم 90% من الشباب وأعتقد الأسباب لا تخفى على أحد ..
لكن عدم تمكن الشباب من الهجرة بطريقة فانونية تدفعهم إلى المخاطرة وتكبد عناء الهجرة الغير شرعية ..
وأعتقد الدولة عليها جانب كبير للتقليل من هذه الظاهرة عن طريق تغليظ العقوبة على الأشخاص اللى بيوفروا للشباب أسلوب غير شرعى للهجرة وكذلك معاقبة من يحاول الهجرة بأسلوب غير شرعى ..
طبعا الكلام ده يسبقه توعية مكثفة زى إعلانات الضرائب كده ..
وتعاون مشترك بين مصر الدول زى ليبيا ودول المغرب العربى لتشديد الحراسة على السواحل ..
وبالنسبة للظاهرة فهى لا تخص الشباب المصرى فقط .. لكنها منتشرة فى كل بلدان شمال أفريقيا بالتحديد ..
Post a Comment