ظاهرة الكش

ظاهرة الكش

ظواهرها ..... اسبابها ......... وعلاجها

بادىء ذى بدء
يعنى ايه الكش : لغويا واصطلاحيا
لغويا : عند البحث فى المعجم وبالتحديد المعجم الوجيز ( اللى من كتر ما هو وجيز ما لاقتشى فيه ولا كلمة بحثت عنها)
كانت النتيجة
لا يوجد الفعل كش فى باب الكاف مع الشين
اصطلاحيا : عارفين كلنا ان الكش مصطلح يطلقه المصريون عندما يجدوا شيئا ما فى حالة اقل مما هو عليه كل مرة
اكيد طبعا بتسمعوا المصطلح ده كتير الايام دى
مثال ( العيش ماله كاشش كدة ليه )
_______________________-
ظواهرها :

اكشن اول مرة

لو انت طالب جامعة او طالبة جامعية
كان عندك محاضرة بدرى وصحيت متأخر ونزلت من غير فطار
وحضرت المحاضرة الاول
وافتكرت ان لسة فاضلك 3 محاضرات كمان وانت طبعا على لحم بطنك ولازم تفطر
تقرر ساعتها انك تدخل الكافيتريا وتطلب ساندوتش ( ايا كان نوعه)
طبعا فى الاول انت عارف ان السندوتشات اسعارها غليت جدا
فيجى فى بالك انهم اكيد هيكبروها عن الاول
تضحى وتدفع الفلوس وتشترى السندوتش اللى المفروض هو اللى هيديك طاقة تخليك تستحمل 3 محاضرات كمان
ده لو ما كنتش مشترك فى جمعية او فى اتحاد او اى اسرة يعنى كمان ممكن يكون فضلك اجتماع بعد المحاضرات
تاخد البون وتروح تاخد الساندوتش
اكيد طبعا ولابد هيكون نظرتك له نظرة تعجب وتملق واستفزار
واكيد كمان الجملة دى هتعدى على تفكيرك ( ماله بس طبق الفول وقرصين الطعمية بتوع الحاجة ساعة الصبحية )
تاكل وتخلص وتطلع بالظبط زى ما دخلت
ولا اكنك عملت حاجة ........... طبعا لازم بعدها تاخد قرار ......... ابقى مجنون لو دخلت الكافتريا دى تانى
______________________________________________
اكشن تانى مرة :
اول السيناريو اللى فات حصل
هتعمل ايه سهرت غصب عنك بلليل وصحيت متأخر تانى ولازم تلحق المحاضرة
مخك يوديك ويجيبك ......... ها اعمل انا كدة محتاج اركز عشان اكمل اليوم على خير
تعدى على الكافتريا وتشم ريحة الشاورما .......نفسك بتقولك ( اوعى يامجنون سندوتشات كاشة تانى حرام )
تقرر فى النهاية انك هتدخل بس المرة دى هتشترى بسكويت وتفتكر ساعة ما كنت بتجيب باكو بسكوت سنيوريتا وتاخد جنبه كوباية الشاى بتبقى مية مية ) واهو نوع من التجديد
تدخل تقول انا احسن لى اجيب باكو السنيوريتا على باكو لمبادة وعلى كيس شيبسى كروكيه عشان مش مقاطعة
تجيب السنيوريتا واللمبادا والكروكيه
وتفتحهم تكتشف ان وباء الكش لم يسلم شىء فى الكافتيريا منه
حتى سنييورتا بتاع زمان ياعينى عليه ولا لمبادا شاله نصه وحتى كروكيه بقوا حاطين فيه عينات لو عجبتك ما عليك الا انك تشترى كروكيه عائلى
وهكذا : تبدا المعاناه ......... تعترف لنفسك فى النهاية ان وباء الكش لم يسلم شىء منه
فتقرر اخيرا قرار لا رجعة فيه بعدم دخول الكافيتريا مرة اخرى ابد ابدا الا بعد زوال هذا الوباء الذى جزمت انه وباء قد لاينتهى
فى هذه الاحيان

_______________________________

اكشن تالت مرة ............... عند فرن العيش الفينو
اكشن رابع مرة .................فى طابور العيش البلدى
اكشن خامس مرة..............لو قررت تغير وتشترى أرص بالملبن او بالنوجه او حتى سادة
اكشن سادس مرة ............. لو فى اول الشهر وانت لسة قابض قررت تجيب بيتزا او كريب
اكشن سابع مرة .................... لو روحت تشترى فراخ من عند بتاع الفراخ ..... لا تتعجب فالفراخ فى بلدنا لا تعانى فقط من الانفلونزا
بل تعانى ايضا من هذا الوباء ( الكش ) الذى احاط بها وجعلها لا تختلف كثيرا عن شكل الكتكوت
وطبعا انتم اكيد لاحظتوا الظاهرة دى فى اكتر من مكان والامثلة كتيرة ما شاء الله
_________________________________________________
اسبابها :
1/ اكيد طبعا غلاء الاسعار
بس الشىء اللى انا متعجبة منه !!!!!!!!!!1
ما دام الاسعار عليت يبقى اكيد المنتجات بتتحسن ! مش كدة ولا ايه ؟
ده الطبيعى ......... لكن اللى بيحصل العكس .... الاسعار بتغلى ........ والمنتجات بتكش وبتفقد جودتها
ده السبب الاول
2/ ثقوب فى الضمير
انا استعرت الجملة دى من د\ احمد عكاشة رائد الطب النفسى فى مصر
لما قال فى اكتر من لقاء ( المصريون بقى عندهم ثقوب فى الضمير )
ده اكيد سبب اكيد لهذه الظاهرة ده من وجهة نظرى انا مش باحثة اجتماعية بس ده مجرد استباط
3/ تزحزح عقائدى ..... وقلة ايمان ........
تعبير غريب طلع منى فجأة ............. اعتقد ان الشخص الصانع ده المفروض يكون امين مع اللى بيبع له
ويضع نفسه مكانه ....... ويضع المسئولية المجتمعية فى حسبانه
والدليل على كدة
ساعات ممكن تلاقى فرن بيطلع عيش كويس ......... وفرن تانى بيطلع عيش كاشش ونازل عليه التخفيض
رغم ان سعر الدقيق واحد
4/ قلة متابعة وقلة مراقبة
طبعا النقطة دى هيطلع منها كلام كتير
زى الرشوة ........ والأكرامية والكلام اللى بنسمعه كل يوم فى التليفزيون
(المفتش قبض ومشى ) حاجة من هذا القبيل
وطبعا اكيد فى اسباب تانية كتير
_____________________________________
طب والعلاج ؟؟؟؟؟؟؟؟؟؟
عليكم انتم بقى

!!!!!!!!!!!!!

عشان نكون ايجابين

تفتكروا ايه علاج الموضوع ده ؟؟؟؟؟؟؟؟؟

وهل فعلا الظاهرة دى موجودة فى حياتكم ولا مش موجودة بشكل ملحوظ ؟

هستنى منكم الاجابة ان شاء الله