اللغة الكنزية الجديدة
.JPG)
تتنوع اللغات الانسانية وتتطور عبر مرور الزمان . وقد تختلف اللهجات فى القطر الواحد
فنجد مثلا فى مصر لهجة صعيدية ولهجة اسكندرانية ولهجة شرقاوية
( لا تتعجب ان للشراقوة لهجة خاصة بيهم يعنى لو سمعت حد بيقول ( مش )
اكتر من خمسين مرة فى الساعة اعرف على طول انه شرقاوى متأصل
وكمان فى لغة بور سعيدية ولغة كفر شيخية وهكذا ...........
...........................................................
ولكنك عزيزى القارىء هل سمعت مسبقا عن اللغة الكنزية الجديدة ؟ !!!!!!!!!!!!!!!!!
بالطبع لا !!!!!!!!!!!!!!!!!!!!!!!!
فهذه اللغة انا بلا فخر المكتشف الاول لها ....... اعوذ بالله من كلمة انا
يرجع اسم اللغة الى
(
بنوتة صغنونة مقطأطة ملبسة مظأتطة مهندمة معسلة
تسمى كنزى
بنوتة اختى
تبلغ كنزى من العمر 3 سنوات الا 3 شهور
اما عن لغتها الجديدة فهى لغة وليدة تتكون من نص حروف اللغة العربية
وتتجاهل الكثير من الحروف ك ......
ق _ك _ س_ ن_ ف_ د_
فهى لا تعترف بهذه الحروف ابدا
........................................
سأعطى لكم بعض كلمات هذه اللغة والمعنى المرادف لها فى العربية
ثم بع ذلك سأعطى لك تدريب بسيط لاختبر مدى المامكم السريع بهذه اللغة
خالتو .................. اتو
نسمة .................. نمة
كمبيوتر .................... اوتر
مكعبات ................. بات
كراسة ................. اسة
قلم ..................... أأم
افتح .................. اتح
عايزة ................. ازة
حدوتة .................. اوتة
الشاطر حسن ................ اتر اتن
جوه ............. اوه
ايشارب .................... اب
الله اكبر ...................... الله ابر
اصلى .....................آلى
______________
التمرين الأول
مستنية الحل:
ترجم هذه الجمل
اتوه نمة ازة اتح اوتر
....................................
التمرين التانى
ازه آب بات
......................
التمرين الثالث
ازه اب ان آلى الله ابر
__________________
وكفاية عليكم كدة النهاردة
فانا اعلم جيدا انها لغة شديدة الصعوبة
وتظهر صعوبتها فى الالمام بمعانى المفردات
وانواع الاصوات وفهمها
فقد تحتار بعض الوقت
هل هذه اللغة مشتقة من اللغة الهندية
ام اليابانية ام العبرية الحديثة؟
فتكتشف فى االنهاية
انا كل منا فى هذا السن بالطبع كانت لديه لغة خاصة
لا يشاركه فيها احد
وهذا من قدرة الخالق سبحان الله
ان جعل كل منا نسيج وحده
19 comments:
جميلة جدا اللغة الكنزية دى ...من المتوقع ان تصبح اللغة الاولى فى العالم خلال سنوات قليلة :)
مدونة جميلة ..واسلوب مسلى و لذيذ جدا ..ان شاء الله هكرر الزيارة
:)
جمييييله اوى اللغه دى....انا بحبها جدا
ربنا يحميهالكم (البنوته مش اللغه ) :) ويحافظ لكم عليها
تحياتى
ربنا يعزك
ويحفاظلك على أختك
ما شاء الله يا نسمة
ربنا يبارك لك فيها يا نمة
ههههههههه
سمر
شكرا ياقمر
على المجاملة اللطيفة دى
نورتى المدونة
حطم قيودك
مش عارفة ليه بحب اسم مدونة حضرتك
بتفكرنى اوى بندوات التنمية البشرية اللى كنت بحضرها
جزاكم الله خيرا على الدعوة الجميلة دى
عمر المصرى
ربنا يباركلك يارب ادعولها جميعا
مروة جمعة
شكر خاص ياجماعة لمروة جمعة لانها لولاها لما نزلت هذه الصورة التى تظهر بها كنزى فى عز النهار
بينى وبينكم مروة هى اللى مصوراها
عقبال يارب لما نصور بنوتك ان شاء الله
كبرتك صح ؟ انا عارفة
الأطفال دول حبى الكبيييييييير
معاهم بنسى كل الهموم والمشاكل
هما بهجة الدنيا وأحلى ما فيها ربنا يخللى كنزى ويحفظها
ايه ده ...انتى حطيتى المدونة بتاعتى عندك ...بجد اكتر جاجة فرحتنى النهارده ..لء بجد بجد فرحت جدا ..خصوصا انى بحب مدونتك و اسلوبك فى الكتابة اوى..
انا مستنية مدونتك الجاية ان شاء الله
http://wa7di-ofakker-137.blogspot.com/
هههههههه
ما شاء الله عسولة جدا ربنا يبارك فيها
تدوينة جميلة
جزاكم الله خيرا
ههههههههههههه
جميله جدا
والظاهر ان البنوته أموره برده
:)
..........
انا ماعرفتش غير الله اكبر
............
بارك الله لكم فيها وجعلها ممن ينصرون الاسلام
ههههههههههههه
بوست هايل
بجد
ربنا يحفظ اخت حضرتك
تحياتى
رقم واحد بتقول .. خالتو نعمه عايزه افتح الكمبيوتر .. رقم اتنين ..عايزه العب مكعبات .. رقم 3 ... عايزه ايشارب علشان اصلى الله اكبر .. صح ؟؟
ربنا يخليهالك ويباركلك فيها
طال الليل
عند حضرتك حق الاطغال حبنا كلنا
معاهم بجد الواحد بينسى كل مشاكله
سمر
بجد انا كمان فرحت لفرحك
انتى باين عليكى امورة خالص
د نصيف
نورت المدونة يادكتور
هى فعلا والله عسولة موت
ومين يشهد للعروسة ؟
انا انسان
الله اكبر
اكتر كلمة بحب اقولها لما بشوفها بتلعب ادامى
حسام يحيى
اكرمك الله يأستاذ حسام
الشاعر
الاجابة الاول تاخد 5 من عشر
لانها خالته نسمة مش نعمة
التمرين التانى
10 من عشرة
على كدة اللغة سهلة
طب الحمد لله
بسم الله ماشاء الله
كنزى دى زى العسل ربنا يحميها ويبارك فيها
ويا خالتو انتى اللى مو فاهمة تعمل هيا ايه يعنى هيا كلامها واضح :)
هههههههههههههههه
رائع جدا
تبارك الخلاق
----
إجابة التمرين الأول :
خالتو نسمة عايزة أفتح الكمبيوتر
التمرين الثاني :
عايزة ألعب مكعبات
التمرين الثالث :
عايزة إيشارب عشان أصلي الله أكبر
----
صح كده ؟
ربنا يخليهالكوا يارب
زى القمر وعسولة خالص
أما عن الأسئلة
فخلتنى اكتشف إنى محتاجة كورس لغات
ننتظر باقى بوستاتك ان شاء الله
ولا حضرتك بتعملى تحديثات للصور
بس
Post a Comment