شوية تفاؤل

جاتلى فترة كدة نفسيتى تعبت فيها حبتين

وثقتى بحاجات كتير بدأت تقل

لحد من حوالى 3 أسابيع كدة بدأت تتعدل إلى حد ما

ياترى أيه الأسباب اللى عدلت نفسيتى ؟

أول حاجة: لقيت خالتو نوال بتتصل بيا طبعا خالتو نوال دى مش خالتى بس أهم فى غلاوة خالتى بالضبط

تقدروا تقولوا كدة هى اللى متبنيانى نفسياً

المهم لاقيتها بتكلمنى وبتقولى فى بكرة مقابلة فى مدرسة خاصة عايزين مدرسات

المدرسة دى لسة جديدة وفكرها جامد جدا لانه اسلامى وفى نفس الوقت منفتح

هتستفادى جامد لو ربنا كرمك بالشغل فيها

المهم روحت المدرسة واكتشفت أن ما فيش مقابلة ده تدريب بس دلوقتى وبعد كدة امتحانات ومقابلات

أيه هنا يدعو إلى التفاءل ؟

اللى بيدعو إلى التفاءل هو أننى لاول مرة أشوف المدرسة اللى طول عمرى بحلم بيها

هى إمكانياتها عادية مش زى كل المدارس الخاصة اللى روحتها

لكن فيها إمكانيات مش موجودة فى أى مدرسة تانية

العنصر البشرى

الناس هناك مؤمنة برسالة التعليم بشكل غير عادى -أن التعليم وسيلة من وسائل نهضة المسلمين عشان كدة بيختاروا كل العناصر البشرية بعناية شديدة

مثال : أن المعلم أو المعلمة لازم يكونوا حافظين قرآن وعارفين تجويد كويس جدا ً بصرف النظر عن تخصصهم حتى لو ألعاب رياضية

لأ ومش بس كدة العاملين والعاملات عاملين لهم دورة فى تجويد القرآن وحفظه

مثال تانى : لازم زى المعلمات يكون فضفاض وفى نفس الوقت يكون أنيق

مثال تالت : الديكور بتاع المدرسة على شكل إسلامى كل حاجة هناك بتحسسك أنك فى مسجد

مؤمنين بمبدأ التدريب المستمر : بيعملوا محاضرات ودورات فى كل ما يخص العملية التعليمية وفى نفس الوقت بيطبقوا اللى أتعلموه

انا قضيت هناك اسبوعين تدريب بصراحة أعجبت بيهم جداً واعجبت بكل أسرة اللغة العربية لاقيتهم شباب وبنات عندهم فكر اسلامى صحيح وفى نفس الوقت متفتحين وعندهم رغبة فى التطوير والتحسين ده غير مستواهم العلمى بسم الله ما شاء الله

ده كان سبب قوى جدا يخلينى أتفاءل

فى سبب تانى ألا وهو

عندما ينتصر الحب

البت منار صاحبتى اتجوزت ياناس

يا كانت مصدعانى بمشاكلها اشى الانتريه واشى الستائر واشى السجاد وكل شوية كانت تيجى ادعيلى بقى ده الجواز صعب بشكل

وأنا أقولها مش أنتوا اللى عايزين تتجوزا استحملوا بقى

منار وأحمد طبعا قصة حب بدأت من اول نظرة هى دائما بتقول كدة طبعاً أنا كنت بقولها بطلى هبل ما فيش حب بيبتدى من أول نظرة ده شغل أفلام

ترد عليا وتقولى أنا كنت فاكرة زيك كدة بس للأسف حصل

طبعا قصة منار وأحمد قصة كفاح جامدة

شهدتها بنفسى وخصوصا إن أحمد زوجها لسة فى بداية حياته عنده حوالى 24 سنة

يعنى بصراحة الناس كافحت جامد واتنازلوا عن حاجات كتير عشان الحياة تمشى

لحد ما الحمد لله أتاهلوا وفرحنا فيهم أصدى بيهم وللأسف انا مش حضرت فرحهم لأنى كنت فى معرض الكتاب وجيت متأخر

عادى يعنى حد يقولها تتجوز وأنا مسافرة راحة معرض الكتاب

القصة التانية

أميرة وضياء

لسة فاكرة أيام ما كنت فى ثانوى كانت أميرة زميلتى فى المدرسة والدروس

كانت تقعد معايا تحكيلى عن ابن الجيران اللى بيحبها وهى كمان وعايز يجى يتقدم لها وأنا أقولها أيه ده لسة بدرى يابنتى أنتى لسة صغيرة

المهم فى يوم كدة لاقيت البت أميرة جاية فرحانة ووشها أحمر مالك يابنتى قالت ضياء جه البيت

قولتلها بجد ها هتعزمينا على أيه ؟

واتخطبت أميرة واحنا فى ثالثة ثانوى وحضرت خطوبتها أنا وماما

ومرت الأيام وكل منا دخل كلية غير التانية

وبقينا نتقابل كل فين وفين

واتقطعت الأخبار وكانت أخر حاجة عرفتها أن ضياء سافر السعودية عشان يكون نفسه لأن برضه كان فى بداية حياته

المهم بقى ياحلوين

الاسبوع اللى فات لاقيت أميرة بتتصل بيا وبتقولى عازماكى على فرحى قولتلها على مين أكيد واحد تانى غير ضياء صح ؟

قالتلى لأطبعاً على ضياء

انتابتنى فرحة ودهشة فى نفس الوقت

يانهار 5 سنين يا أميرة ما شاء الله الله أكبر ده أنتى يابنتى من الصابرات

قالتلى اصله سافر سنتين ونص ولسة راجع

المهم لازم تحضرى الفرح قولتلها أكيد ياباشا

هو أنا أقدر

فعلاً هى دى البنت المصرية الجدعة اللى بتستحمل كتير

وفعلاً لما الحب بيبقى قوى بينتصر فى النهاية

هو أنا دائما بقولوه نظرى

لكن الأيام دى بدأت أشوفه حواليا عملى

بس ده برضه مش هيخلينى اتنازل عن مبادئى

أن الحب الحقيقى هو اللى بيبقى قائم على هدف إرضاء الله عز وجل

وبناء أسرة مسلمة عندها من القيم والمبادىء اللى تخليها ترفع راية الإسلام