Thursday, February 12, 2009

شوية تفاؤل





جاتلى فترة كدة نفسيتى تعبت فيها حبتين

وثقتى بحاجات كتير بدأت تقل

لحد من حوالى 3 أسابيع كدة بدأت تتعدل إلى حد ما

ياترى أيه الأسباب اللى عدلت نفسيتى ؟

أول حاجة: لقيت خالتو نوال بتتصل بيا طبعا خالتو نوال دى مش خالتى بس أهم فى غلاوة خالتى بالضبط

تقدروا تقولوا كدة هى اللى متبنيانى نفسياً

المهم لاقيتها بتكلمنى وبتقولى فى بكرة مقابلة فى مدرسة خاصة عايزين مدرسات

المدرسة دى لسة جديدة وفكرها جامد جدا لانه اسلامى وفى نفس الوقت منفتح

هتستفادى جامد لو ربنا كرمك بالشغل فيها

المهم روحت المدرسة واكتشفت أن ما فيش مقابلة ده تدريب بس دلوقتى وبعد كدة امتحانات ومقابلات


أيه هنا يدعو إلى التفاءل ؟

اللى بيدعو إلى التفاءل هو أننى لاول مرة أشوف المدرسة اللى طول عمرى بحلم بيها

هى إمكانياتها عادية مش زى كل المدارس الخاصة اللى روحتها

لكن فيها إمكانيات مش موجودة فى أى مدرسة تانية

العنصر البشرى

الناس هناك مؤمنة برسالة التعليم بشكل غير عادى -أن التعليم وسيلة من وسائل نهضة المسلمين عشان كدة بيختاروا كل العناصر البشرية بعناية شديدة

مثال : أن المعلم أو المعلمة لازم يكونوا حافظين قرآن وعارفين تجويد كويس جدا ً بصرف النظر عن تخصصهم حتى لو ألعاب رياضية

لأ ومش بس كدة العاملين والعاملات عاملين لهم دورة فى تجويد القرآن وحفظه

مثال تانى : لازم زى المعلمات يكون فضفاض وفى نفس الوقت يكون أنيق

مثال تالت : الديكور بتاع المدرسة على شكل إسلامى كل حاجة هناك بتحسسك أنك فى مسجد

مؤمنين بمبدأ التدريب المستمر : بيعملوا محاضرات ودورات فى كل ما يخص العملية التعليمية وفى نفس الوقت بيطبقوا اللى أتعلموه

انا قضيت هناك اسبوعين تدريب بصراحة أعجبت بيهم جداً واعجبت بكل أسرة اللغة العربية لاقيتهم شباب وبنات عندهم فكر اسلامى صحيح وفى نفس الوقت متفتحين وعندهم رغبة فى التطوير والتحسين ده غير مستواهم العلمى بسم الله ما شاء الله

ده كان سبب قوى جدا يخلينى أتفاءل

فى سبب تانى ألا وهو

عندما ينتصر الحب
البت منار صاحبتى اتجوزت ياناس

يا كانت مصدعانى بمشاكلها اشى الانتريه واشى الستائر واشى السجاد وكل شوية كانت تيجى ادعيلى بقى ده الجواز صعب بشكل

وأنا أقولها مش أنتوا اللى عايزين تتجوزا استحملوا بقى

منار وأحمد طبعا قصة حب بدأت من اول نظرة هى دائما بتقول كدة طبعاً أنا كنت بقولها بطلى هبل ما فيش حب بيبتدى من أول نظرة ده شغل أفلام

ترد عليا وتقولى أنا كنت فاكرة زيك كدة بس للأسف حصل

طبعا قصة منار وأحمد قصة كفاح جامدة

شهدتها بنفسى وخصوصا إن أحمد زوجها لسة فى بداية حياته عنده حوالى 24 سنة

يعنى بصراحة الناس كافحت جامد واتنازلوا عن حاجات كتير عشان الحياة تمشى

لحد ما الحمد لله أتاهلوا وفرحنا فيهم أصدى بيهم وللأسف انا مش حضرت فرحهم لأنى كنت فى معرض الكتاب وجيت متأخر

عادى يعنى حد يقولها تتجوز وأنا مسافرة راحة معرض الكتاب


القصة التانية

أميرة وضياء

لسة فاكرة أيام ما كنت فى ثانوى كانت أميرة زميلتى فى المدرسة والدروس

كانت تقعد معايا تحكيلى عن ابن الجيران اللى بيحبها وهى كمان وعايز يجى يتقدم لها وأنا أقولها أيه ده لسة بدرى يابنتى أنتى لسة صغيرة

المهم فى يوم كدة لاقيت البت أميرة جاية فرحانة ووشها أحمر مالك يابنتى قالت ضياء جه البيت

قولتلها بجد ها هتعزمينا على أيه ؟

واتخطبت أميرة واحنا فى ثالثة ثانوى وحضرت خطوبتها أنا وماما

ومرت الأيام وكل منا دخل كلية غير التانية

وبقينا نتقابل كل فين وفين

واتقطعت الأخبار وكانت أخر حاجة عرفتها أن ضياء سافر السعودية عشان يكون نفسه لأن برضه كان فى بداية حياته

المهم بقى ياحلوين


الاسبوع اللى فات لاقيت أميرة بتتصل بيا وبتقولى عازماكى على فرحى قولتلها على مين أكيد واحد تانى غير ضياء صح ؟

قالتلى لأطبعاً على ضياء

انتابتنى فرحة ودهشة فى نفس الوقت

يانهار 5 سنين يا أميرة ما شاء الله الله أكبر ده أنتى يابنتى من الصابرات

قالتلى اصله سافر سنتين ونص ولسة راجع

المهم لازم تحضرى الفرح قولتلها أكيد ياباشا

هو أنا أقدر

فعلاً هى دى البنت المصرية الجدعة اللى بتستحمل كتير

وفعلاً لما الحب بيبقى قوى بينتصر فى النهاية
هو أنا دائما بقولوه نظرى
لكن الأيام دى بدأت أشوفه حواليا عملى
بس ده برضه مش هيخلينى اتنازل عن مبادئى
أن الحب الحقيقى هو اللى بيبقى قائم على هدف إرضاء الله عز وجل
وبناء أسرة مسلمة عندها من القيم والمبادىء اللى تخليها ترفع راية الإسلام

13 comments:

sara draz said...

ماشاء الله على الموضوع
احنا كمان اخدنا شوبة تفاؤل وامل
والله اخيرا ..انا مش مصدقة حكاية المدرسة ديه
طيب هيه فيين ولا اسمها ايه اى حاجة طيب
عموما ما شاء الله
فعلا الدنيا لسة فيها خيير والناس لسة فيها امل
والف الف مبروووووووووووك على صحباتك

فعلا هيه ديه البنت المصرية الجدعة
بجد البوست جاامد
وتحياتى اليكى
وتسلمين

بذرة امل said...

ازيك ياريحانة
نورتى المدونة ياقمر
المدرسة اسمها أنوار الحرمين فى بردين
هى لسة السنةدى أول سنة

عربي نيوز said...

ما شاء الله
موضوع رائع
وأتمنى ان تكوني دائماً مليئة بالأمل والتفاؤل وان تكون حياتك مغمورة بالسعادة والجمال
وان شاء الله بتلاقي الوظيفة في المدرسة في ايسر الامور

لا تنسوا اخوانكم في غزة من دعائكم

||..بحــر الدموع..||

الرابطة وبناء الأمة said...

السلام عليكم ورحمة الله وبركاته
دعوة
أخي يا من رفضت سياسة مبارك عليك أن تكمل معنا الطريق حتي لا تكون دعواك دعوة إفتراء دون إثبات
دعوي مرفوعة ضد مبارك بنص ".........................."
أول جلسة
نتمني منك أخي المدون الحضور للجلسة
مع تحياتنا لك بالتوفيق
الكتيبة السياسية

Unknown said...

ازيك يانسمة

فين المدرسة دي

انا فرحت والله ... الحمد لله لسة في خير

mohammed alsha3r said...

يعنى التفائل دق الباب عندنا سمعتي عن فرص العمل او الزواج

ياستي من هنا من موقعى حيث بلاد المنصورين قصدى الدقهلاويين

أدعو بكل ما املك من دعوات

اللهم يسر لك أحوالك
نشوفك أحسن صحفيه فى الدنيا
ويرزقك بالزوج الصالح
اللى لو حبك يكرمك ولو كرهك لا يظلمك


حد يقول امين

وسلامنا لكل أهلنا فى الزعازيع

بذرة امل said...

بحر الدموع
بسعد جدا لما بلاقى تعليق حضرتك فى المدونة بحس ان ما فيش حدود بينا وبين أهلنا فى غزة
ربنا ينصركم ويثبت أقدامكم
اللهم امين

بذرة امل said...

نور
المدرسة دى فى بردين تبع جمعية الهداية اسمها مدارس انوار الحرمين

بذرة امل said...

محمد الشاعر
نفسى أفهم ليه الناس بتقولى شكلك تنفعى صحفية الأسبوع ده ناس كتير قالولى كدة
انا عامة بحب الميديا جدا ومن المهتمين بيها
لكن صحفية مش فكرت
انا بحب اكون رويتر بس
زى ما صحابى بيقولوا عليا
هسلملك على الزعازيع ولاد عم الميت غمرين
الدقهلويين المنصوريين

Mohamed said...

very few girls think the way u thinking about marriage his why inshllah you ll have all our dreams come true just be patient matter of time inshallah i ll remind u later (:
t7aty liky wa lokol ahl alzkazik ale a3z asdka2y fehaa (:

د.توكل مسعود said...

السلام عليكم ورحمة الله....وبعد
أسأل الله أن ينفع بك حيثما كنت..ولكن إذا كان الكلام"بجد" فأعتقد أن مدرسة اللغة العربية لا ينبغى أن تكتب
بالعامية

وفى الفصحى متسع والتمرين عليها سهل وميسور وأول الغيث قطر ورحلة الألف ميل تبدأ بخطوة

تحياتى..... والله معك

حسام غانم said...

كويس جدا إن لسه فيه مدارس بالشكل ده

ومبروك للعرايس

مونتي بوكيه ورد said...

فعلا ما شاء الله علي الامل والتفاؤل ال زاد جوانا في كلامك يا بذرة امل
جميل ان يكون نتاج كل علاقة حب ان تتوج بالزواج و بداية رحلة في تربية اولاد لمستقبل اجمل ... وعجبني اوي كلمتك

وفعلا لما الحب بيبقي قوي بينتصر في النهاية .. الحب ال مبيهزوش ظروف ولا بينهيه مظاهر خداعه وفلوس بتغري
الحب ال من القلب ال فيه رضا بالحبيب ... ياه يارب نشوف المثال دا في كل الناس حوالينا ... ربنا يكرمك وتدي الامل دايما لقلوب الناس