عقبالنا يارب

امبارح كان فعلاً يوم تاريخى مش بس فى تاريخ امريكا

لأ ده فى تاريخ العالم كله رغم أن النتيجة كانت واضحة

ومعروفة من قبلها

لكنى كنت شغوفه جداً وعايزة أعرف السيستم اللى هتتم بيه الانتخابات

اكتر من معرفتى بمين اللى هيمسك امريكا لأنى عارفة أن التغيير مش هيبقى كبير

وخصوصا بعد ما سمعت وعرفت مدى حب الأخ اوباما لإسرائيل

بس أنا كنت عايزة أشوف الناس دى بتفكر ازاى

وبصراحة ....بقيت اسمع التقاير الأخبارية اللى بتتكلم عن مسيرة الانتخابات والطريقة اللى بتتم فيها

بصراحة كدة حسيت بحسرة فى قلبى شديــــــــــــــــــــــــــــــدة

لأن من المفروض أننا كمجتمع إسلامى نكون قدوة لكل العالم فى الحرية والديمقراطية والأخذ بالرأى والسماع للرأى الأخر

لكن للأسف الواحد حاسس أنه فعلا فى بلد لا تعلم عن الإسلام شيئاً

حاولت أقارن بين اللى بيحصل الايام دى فى أمريكا

وشعور الشعب الامريكى أنه صوتوا مسموع

بجد إحساس جميل إنك تحس إنك ليك قيمة فى بلدك

أنا بقارن بين أيه وأيه ؟

ياسبحان الله

افتكرت دلوقتى يوم الاستفتاء على التعديلات الدستورية

فى اليوم ده أنا كنت مشتركة فى مهرجان الأسر الجامعية فى جامعة الزقازيق وكنت مسئولة عن أسرة فى الكلية

وبعد طابور العرض ما خلص وقفونا أمام بوابة الجامعة وطلبوا مننا أننا نطلع برا الجامعة ونمشى فى الطريق لحد ما نوصل لأقرب مدرسة للجامعة ونروح ندلى بأصواتنا يوميها أنا روحت المدرسة فضول بس عشان أعرف أيه النظام هناك وعملت اللى فى دماغى وقاطعت التصويت أنا واللى معايا يوميها شوفت الديمقراطية اللى على حق

واللى الحزب الوطنى داوشنا بيها ليل ونهار

كل عمداء الكليات جايين ورا بعض عشان يصوتوا ويوفعوا راية نعم لأى حاجة الريس يقول عليها

وكل كلية باعتة أتوبيس بالموظفين بتوعها من أصغر موظف لأكبر موظف .

وبصيت لاقيت فجأة القناة الرابعة جاية تصو ر الزحمة اللى على الباب على أساس إن فى إقبال شديد على التصويت

وإن الشعب طبعا موافق وكل حاجة تمام

بصراحة يوميها كانت مسرحية بايخة

مليانة بالسخافات كله فيها بيضحك على كله

عارفين أنا حاسة دلوقتى أنى غلطت أن فكرت لمجرد التفكير فى عقد مقارنة بينا وبينهم

بس انا من حقى أحلم

ما هو برضه

لوبطلنا نحلم نموت

انا بس بتمنى وبحلم وبقول عقبالنا يااااااااااااااااااااارب

نفسى اشوف اليوم ده قبل ما اموت