ماتت قبل ان تعرف بموت اخيها

ماتت قبل ان تعرف بموت اخيها

للمرة الثانية قررت اكتب مباشرة دون ترتيب او تنظيم

ولكنى المرة دى عارفة انا هكتب فى ايه

فى الايام اللى فاتت اكيد لاحظتوا انطباع الحزن فى كتاباتى ده يمكن

بسبب اسباب كتييرة من ضمنها احساس العجز الى انتابنى لما عرفت

ان عمتى اخت ابى اللى بحبها جدا واللى هى كمان بتحبنى جدا

واللى بقالى حوالى بالضبط 3 سنين ونص ما شوفتهاش

فى المستشفى بتموت بعد ما قطعولها رجليها

عشان كانت عندها سكر

طيب وانا ليه بقالى 3سنين ما شوفتهاش؟؟؟؟

هقولكم من البداية

عمتى دى رحمها الله كانت بتحب بابا رحمه الله جد جدا وهو الوحيد اللى كان بيسأل عليها على طول ويروحلها القاهرة

فا هى جالها بعيد عن السامعين جلطة من 3 سنين

وبعدها على طول والدى توفى فأولادها قرروا انها ما تعرفشى عشان الزعل غلط عليها وخصوصا انها كانت بتحبه جدا

ومن ساعتها

وهى لما بتسال عليه يقولولها تعبان فى المستشفى

ومن ساعتها واحنا مش عارفين نكلمها خالص لان اولادها خايفين يبان علينا وهى تعرف

واستمرت المحاولات

لمدة 3 سنين

ولما عرفت انها خلاص بتموت

حاولنا نروح نزورها كانت الاجابة دى لو عرفت ممكن تروح فيها

لما واحدة تعرف ان اخوها مات من 3 سنين وهى ما تعرفشى هيكون رد فعلها ايه؟

عشان كدة كنت مضايقة اوى

انا وامى واخواتى عشان نفسينا نشوفها ومش عارفين

لحد امبارح بعد صلاة الجمعة جالنا ترنك انها تعيشوا انت

حسيت ساعتها بألم جوايا كبير

وشوفت صورة ابويا وافتكرت كل شىء لما كنت بروحلها

وسافرت وروحت القاهرة وكانت ليلة صعبة علية اوى

انا بدعيلها ربنا يغفر لها

انا عارفة انها ماتت زعلانة من ابى انه مش بيسأل عليها

لكن اكيد هى عرفت

والله اعلم

يوميها شوفت ناس كتير كلهم المفروض انهم قرايبى اخر مرة شوفتهم كانت يوم جنازة ابى

ومن ساعتها

اللى ابن عمى وبنت عمتى وناس كتير نسيت اسمهم

وهما كمان نسيوا شكلى واستغربوا ................. بقيتى فى الليسانس ما شاء الله كبرتى

وسمعت اعذار كتير

معلشى مش بنسال عليكى انتى عارفة ظروف الحياه

قولتهم لا عادى انا مش زعلانة

اصلى خلاص اتعودت

على الزمن اللى الاخ بينسى فيه شكل اخوه

والللى الزمن خلانى اشوف ابن عمتى اول مرة فى جناازة ابى وبنت خالتى يوم فرحها

عادى جدا ولا فى اى شىء

عادى جدا ولا فى اى شىء

ورجعت تانى ادعى لعمتى بالرحمة والمغفرة

واقرأ لها سورة يس

وقولت ياترى المرة اللى جاية هشوف الناس دى كلها امتى؟

وياترى لو شوفت حد فيهم مرة حيفتكرونى ولا لأ