تخاريف2
انا النهاردة قررت انى اكتب حاجة على المدونة بس بصراحة انا لحد هذه اللحظة
مش عارفة هكتب فى ايه
انا عندى الايام دى نوع من انواع العشوائية فى التفكير بفكر فى كل حاجة واى حاجة سياسة دين اجتماع تربية شعر قصص كل حاجة وكمان
بقيت بكلم نفسى كتير جدا اوعى حد يقول عليا انى اتجنيت بس حالة كدة بتروح وبتيجى
يعنى مثلا بمناسبة عيد الحب سالت نفسى سؤال
هما ليه الناس بتحب؟
كنت الاجابة علشان تبقى سعيدة
سالت نفسى هو انتى ليه بتحبى حاجات معينة ........ .....كانت الاجابة عشان بحبها
طب هى بتسعدك ............. كانت الاجابة لا بالعكس بتعطلنى وبتألمنى
لاقيت نفسى دخلت في حوارات
هبلة قوى
طلعت منها انى الايام دى سبت معظم الحاجات اللى كنت بحبها بجد والله ولاقيت دموعى عايزة تنزل ...........
فكرت وقولت ..........لا شىء يستدعى البكاء
_____________
مش عارفة ليه يا جماعة بتجيلى لحظات كتير ببقى عايزة اعيط فيها
مش عارفة ليه وايه السب
يعنى مثلا يوم فوز مصر بكاس افريقيا ليل نمت معيطة
مجنونة آه انا عارفة .... تخيلوا لسبب تافه هو انى ما لاقتش صحابى واخواتى حواليّ
_________________
من ضمن التخاريف برضه
لاقيت نفسى بقول انا عايزة اقفل المدونة
ليه ؟
قولت كدة ؟
لانها مسئوليه وانا لسة مش قدهاا
بس قررت انى هحاول اكون قدها
بس شوية مجهود وشوية صبر
___________
احاسيس بتوحشنى
هقولكم بصراحة فى احاسيس بتوحشنى قوى الايام دى
زى احساس النجاح والانجاز والعطاء
واحساس التمكن من الشىء
يعنى نفسى اكون عارفة كل شىء عن شىء واحد
وكمان اكون عارفة شىء عن كل شىء
وكمان احساس الابداع واحشنى قوى نفسى احس انى عملت شىء جديد
احاسيس كتير اوى مش لازم اذكرها كلها
______________________
في حاجة كمان
لما سمعت موضوع الرسوم الدنماركية تانى
حسيت بضعف شديد
وانى نفسى اعمل حاجات كتييييييييييير
لكنى مش بايدى
بس يارب اقدر اعمل شىء
__________ولو بسيط
________
ده نوع من الفضفضة ما حضرتش ليها قبل ما اكتبها
لانى كنت عايزاها تكون صادقة من غير ترتيب
بجد ادعوللى اوى الايام دى
ان ربنا يرزقنى علما نافعا ورزقا طيبا وعملا متقبلا
10 comments:
السلام عليكم و رحمة الله و بركاته
شوفتى بقى لما اقولك انتى فيكى حاجه مش تكابرى و تقولى لأ
بصى يا حبيبتى موضوع البكاء فى اى وقت و ممكن يكون من غير سبب
ده حاجه طبيعيه بتحصل لناس كتير و طبعا انا منهم
( هى غالبا بتحصل لـ 99% من البنات) السبب فيها بيكون نوع من الخنقه
موضوع انك نفسك ترجعى لجاحات كنتى بتعمليها و دلوقتى لأ و انك نفسك تعملى حاجات كتير
دى النصيحه اللى دايما امى بتقولهالى و اخيرا انا صدقت النصيحه دى
و هى
الوقت .الوقت ...... الوقت
نظمى وقتك كويس اوى حتلاقى نفسك بتعملى كل اللى انتى عايزه و حيفضل وقت كمان تعملى اللى انتى مش عايزه
ربنا يوفقك إن شاء الله و اسمع عنك اخبار كويسه
أشوفك إن شاء الله يوم الخميس ؟؟؟؟
السلام عليكم و رحمة الله و بركاته
يااااه يا بذرتي
ده كله! معلش والله هي بتبقى حالات بتعدي على الواحد كده
بصي يا بنتي
اياكِ واليأس.. إياك واليأس، والبكاء ده نعمة كبيرة على فكرة يعني..
صدقيني انتِ جواكي طاقات وحاجات حلوة كتير انتِ غافلة عنها
بس هتطلع هتطلع إن شاء الله
ياللا يا جميل..
أشوفك على ألف خير وهنا.. إن شاء الله
صباحك مسك وعنبر
بداية ، معرفة المشكلة هو نصف الطريق إلى علاجها
وأظن أن سبب شعورك هذا أن نفسك - وهذه طبيعتها كنفوسنا كلنا - ترغب أن تتخلص من كل هذه المشكلات في أسرع وقت ممكن وبأقل مجهود ممكن
لذلك :
- علمي نفسك أنك بشر ، لك طاقة وقدرة فلا تحملي نفسك أكثر من طاقتها
- لا تتعاملي مع المشكلات كلها مجتمعة فتتعبين ، بل اختاري أهمها وأعجلها وتعاملي وكأنها مشكلتك الوحيدة
- لا تتوقعي أن تبلغي الكمال ، فإن السعي للتميز من صفات الهمم العالية ، لكن البحث عن الكمال قد يصيب الإنسان بالإحباط إذا لم يجده ، وهو - في الواقع - ليس ببالغه ( لا تقنعي في ذات الوقت بما دون قدراتك )
- بالنسبة للمدونة ، فقد تكون - حقا - مسئولية ، لكنها فقط مسئولية بقدر قدرتك عليها لا أكثر "لا يكلف الله نفسا إلا وسعها"
- ليكن رفيقك "أجندة" فيها مواعيدك الأسبوعية ومهامك اليومية - الواقعية - وستشعرين حينها براحة طيبة
ندعو الله أن يفرج كربك وأن يشرح صدرك
علي فكرة احسن حاجة الفضفضة مع النفس
وبحس ان المدونة بتفضفضي فعلا فيها مع نفسك بس افيد شوية عن ما بتفضفضي مع نفسك لانك لما بتكلمي نفسك محدش بيسمعك غيرك
لكن هنا في ناس بتسمعك
وممكن تفكري وتقولي كلمة شايفة انها تافه وشايفة نفسك غلط وتلاقي حد بيايدك وبيقولك انت صح
انت طبيعية
وتلاقي حد معاكي ويمكن اكتر منك كمان
انت فعلا طالما بتفكري كدا
وحددتي بالظبط انت عايزة تعملي اية وتبقي اية او هدف واحد قوي وتحاولي تحققيقة اكيد هتنجزي
انا سعيد بزيارتك ليا
واتمني انها تتكرر ونبقي اصدقاء
ومدونة الاسكندرانية نورت بيكي واسكندرية كلها بتسلم عليكي
عايزة اقولك حاولي يومين ورا بعض كدا تصلي قيام وتقري قران وتصلي فجر
اكيد هتحسي بتغير وانتعاش
وياريت لو قريب منكم مسجد روحي انا لما ببقي مخنوقة ككدا ادامي مسجد بروح اصلي قبل الفجر شوية واقرا قران لغاية ما الفجر يقيم
بحس بانتعاش وريفريش
جربي
سلام
مني....... ونت اسمك اية؟
اللهم ارزقها علما نافعا ورزقا طيبا وعملا متقبلا
أظن دى اول مرة أدخل على مدونتك
ربنا يكرمك يارب
بذرة أملنا
أحلى ما فى الخواطر أن تأتى بدون ترتيب
لتكون صادقة
إنتى بس محتاجة قعدة تركيز مع الذات
تظبطى أولويات حياتك من تانى
ترسمى الخطة المحددة بالظبط
هتلاقى الدنيا راقت وابتديتى تمشى على خطوات ثابتة
هتحسى معاها براحة ورضا
وسلالالالام
لغاية ما أشوفك
مش كان فى مشروع بكده برضوه؟؟؟؟
بجد يا جماعة انا سعيدة جدا
على ردودك دى
انا بس زى ما خبيب بيقول عندى حاجات كتير عايزة انجح فيها
وبركز فى كل حاجة شوية وبعد كدة بنساها
انا فعلا محتاجة احدد اولوياتى
انا لسة جاية دلوقتى حالا من المسجد وربنا الهم عليا بشوية افكار
هبتدى بأذن الله بتنفيذها
وهمشى خطوة خطوة بس بتركيز
وهغمى عينى عن كل حاجة بتحرق دمى وبتوقفنى عن طريقى
ويارب اقدر
ادعولى النتيجة الاسبوع اللى جاى
ان شاء الله
صاحبة رسالة
جزاكى الله خيرا
وان شاء الله انفذ نصيحة طنط بأذن الله هى معاها حق
مروة جمعة
ادعى يامروة الحاجات الحلوة اللى جوايا دى تطلع بقى نفسى اشوفها بجد ادامى
د خبيب
لا تتعاملي مع المشكلات كلها مجتمعة فتتعبين ، بل اختاري أهمها وأعجلها وتعاملي وكأنها مشكلتك الوحيدة
دى ممكن تكون المشكلة اللى عندى فعلا
جزاكى الله خيرا يا دكتور
my hopes
انا زمان كنت لما بتضايق بتكلم
لحد ما شعرت ان ده نوع من انواع الضعف اللى مش لازم يظهر ادام الناس
ومن ساعتها وانا قولت لما اضايق افضفض بس مع نفسى عشان
ما حدش يعرف انى مضايقة
لكن حضرتك عندك حق
لان الفضفضة بتخلى الناس تسمعك وتنصحك
جزاك الله خيرا
ابن عمر
نورت المدونة
وجزاك الله خيرا على الدعاء ربنا يباركلك
فزلوكة
ده اميلى
bezret_amal@hot
ضيفينى عندك
عشان نحدد الميعاد ان شاء الله
اللحظه اللى فكرتى فها بالطريقه دى اسمها لحظة صدق مع النفس
وصدقينى ده شئ ايجابى جدا ان الواحد يراجع نفسه اول باول
لان فى ناس كتير بتبقى متخيله بل ومتاكده انها صح وكل العالم ده غلط
صدقينى بوستك عجبنى جدا
واتمنى انه يكون بدايه لحاجات جميله هتطلع من جواكى
تقبلى تحياتى
Post a Comment